కవిత్రయ శ్రీమదాంధ్రమహాభారత ప్రశ్నోక్తి- 039 (191 – 195)

ఓం గణేశాయనమః – గురుభ్యోనమః

                                                                         __/\__       

నారాయణం నమస్కృత్య  – నరంచైవ నరోత్తమమ్|

దేవీం సరస్వతీం వ్యాసం – తతో జయముదీరయేత్|

[డా.తిప్పాభట్ల రామకృష్ణమూర్తిగారి మహాభారత ప్రశ్నోక్తి (క్విజ్) పుస్తకము (1994) ఆధారంగా]

1. ఒంటరిగా చేయరాని పనులేవి?
2. దుర్మార్గులకు గర్వమూ, సన్మార్గులకు వినయమూ కలిగిస్తాయిట మూడు; అవి ఏవి?
3. పాండవులు ఎవరి సలహాతో ధృష్టద్యుమ్నుని సైన్యాధ్యక్షుని చేశారు?
4. ప్రవర్తన అనే సముద్రాన్ని తరింపజేసేది ఏది?
5. రోషం మూర్తీభవించిన వృక్షం దుర్యోధనుడు; దీని మూలశక్తి ఎవరు?
--------------------------------------------------------------------------------

సమాధానములు (జవాబులు):
1. అ)మధుర పదార్ధాలు తినరాదు ఆ)పదిమంది నిద్రిస్తూంటే మేల్కొనరాదు ఇ)ఆలోచించరాదు   

  ఈ)బాటవెంటపోరాదు - ఉద్యోగపర్వము – ద్వితీయాశ్వాసము – 38 పద్యము
క|| విను మధురాహారంబులు
    గొనుటయుఁ బెక్కండ్రు నిద్ర గూరినయెడ మే
    ల్కనియునికియుఁ గార్యాలో
    చనముఁ దెరవు నడుచుటయును జన దొక్కనికిన్. (38)

2. ధనము, విద్య, వంశము. - ఉద్యోగపర్వము – ద్వితీయాశ్వాసము – 35 పద్యము

క||ధనమును విద్యయు వంశం

    బును దుర్మతులకు (దుర్మదులకు) మదంబుఁ బొనరించును (బొదలించును) స

    జ్జను లైనవారి కడఁకువ

    యును వినయము నివియ తెచ్చు నుర్వీనాధా. (35)

3. కృష్ణుని సలహాతో. - ఉద్యోగపర్వము – చతుర్థాశ్వాసము – 103 పద్యము

క|| అనుటయు దామోదరుఁ డి

    ట్లను ధృష్టద్యుమ్నుఁ డర్హుఁ డగునభిషేకం

    బొనరింపుము పేరోలగ

    మున నక్షోహిణుల కెల్ల ముఖ్యుఁడు గాఁగన్ (ముఖ్యుఁడగుటకున్)(103)

4. సత్యమనే నావ. - ఉద్యోగపర్వము – ద్వితీయాశ్వాసము – 39 పద్యము

క||నడవడి యనుమున్నీటిం

   గడవం బెట్టంగ నోడకరణిం దగి తా

   నొడఁగూడు ననిన సత్యము

   గడిచినగుణ మింక నొండు గలదే యరయన్. (39)

5. ధృతరాష్ట్రుడు. - - ఉద్యోగపర్వము – ప్రథమాశ్వాసము – 355 పద్యము

ఆ||రోషమయమహాతరువు సుయోధనుఁ డురు

    స్కంధ మందులోనఁ గర్ణుఁడలరుఁ (డరయఁ)

    గొమ్మ సౌబలండు గుసుమఫలములు దు

    శ్శాసనుండు మూలశక్తితండ్రి. (355)

******************************************************************************************