తెలుగు సుద్దులు - వేమన పద్యములు (తెలుగు - ఇ కూటమిలో పెట్టబడినవి)-108

తెలుగు సుద్దులు…..(108)

               

ఆ.వె|| మదినె`రిగిన వాని మహి (మ*) గాన మెం`దును

         మదినె`రుంగు నరుడు మహిని నరుదు (నరుడె మహిమనుజుఁడు*)

       వెదకి తనువులోన వేడ్కతో నిను జూచు      

         విశ్వదాభిరామ వినర వేమా!.

* పాఠాంతరము

భావముః

ఈ భూమి మీద ఆత్మ గురించి సంపూర్ణంగా తెలిసిన వానిని (పరమేశ్వరుని) ఎక్కడ చూడలేము.  భూమి మీద ఆత్మతత్వము (జ్ఞానము) గురించి తెలుసుకొనే (గ్రహించే) వ్యక్తే నిజమైన మనుష్యుడు.  అతడు ఎంతో ఆర్తితో (కోరికతో, ప్రార్ధనతో) తనలో ఉన్న నిన్ను (పరమాత్మను-ఆత్మలింగము) వెదికి దర్శించగలడు.

పరమేశ్వరుడు (భగవంతుడు) వేరే ఎక్కడలేడు, నీలోనే ఉన్నాడురా, అది గ్రహించి నీలో ఉన్న ఆ అత్మ స్వరూపాన్ని దర్శించి ఈ మానవ జన్మ ధన్యత చేసుకోమని ఈ పద్యంలో వేమన ఒక యోగిగా మనకు ఆత్మ తత్వం యొక్క విశిష్ఠత తెలుపుతూ, దిశా నిర్దేశము చేస్తూ హితవు పలుకుతున్నారు. అంతే కాకుండా, ప్రతి వ్యక్తిలోను (జీవిలో) పరమేశ్వరుడున్నాడు అనేది కూడా వ్యక్తీకరించినట్లున్నది. ||14-11-2014||