కవిత్రయ శ్రీమదాంధ్రమహాభారత ప్రశ్నోక్తి – 99 (491-495)

ఓం గణేశాయనమః – గురుభ్యోనమః  

 __/\__

నారాయణం నమస్కృత్య – నరంచైవ నరోత్తమమ్|

దేవీం సరస్వతీం వ్యాసం – తతో జయముదీరయేత్||

[డా.తిప్పాభట్ల రామకృష్ణమూర్తి గారి మహాభారత ప్రశ్నోక్తి (క్విజ్) పుస్తకము (1994) ఆధారముగా.]

1.             కర్ణుని చావుకు కారణాలు ఎవరెవరు?

2.            అర్జునునకు బీభత్సుడనే పేరు ఎందుకు వచ్చింది?

3.            “పరాయణము పరమధర్మపథములకెల్లన్”ఆ పరాయణము ఏది?

4.            పరీక్షిత్తు ఎవరి దగ్గర ధనుర్విద్య నేర్చాడు?

5.            ప్రతి స్మృతి విద్యను వ్యాసుడెందుకు చెప్పాడు?

---------------------------------------------------------------------------------------------------- 

సమాధానములు (జవాబులు):

1. ౧)బ్రాహ్మణుడు ౨)పరశురాముడు ౩)ఇంద్రుడు ౪)కుంతి ౫)భీష్ముడు ౬)శల్యుడు ౭)కృష్ణుడు ౮)అర్జునుడు ౯)భూదేవి –

2.బీభత్సంగా యుద్ధం చెయ్యడు కాబట్టి – విరాటపర్వము – చతుర్థాశ్వాసము – 144పద్యము

 నకుర్యాంకర్మ బీభత్సం।

తే॥వీరులకుఁ జూడ బీభత్స విధముగలుగ

    నట్టి కార్యంబు సేఁతకు నెట్టిసమర

    భంగులను దడఁబడక బీభత్స సేయ

    దాన బీభత్సుఁ డనునభిధానమయ్యె. (144)

3. ఇతరులు ఏపని చేస్తే తనకు బాధకలుగుతుందో ఆపని తాన ఇతరులకు చేయకపోవడమే పరమధర్మం. – శాంతిపర్వము – పంచమాశ్వాసము – 220పద్యము

క॥ఒరులేమేని నొనర్చిన

   నరవర యప్రియము తనమనంబున కగుఁ దా

   నొరులకు నవి చేయ కునికి

   పరాయణము పరమధర్మపథముల కెల్లన్. (220)

4.కృపాచార్యుని దగ్గర – మహాప్రస్థానికపర్వము – 17వచనము

వ॥శేషించిన కాంచనరత్నాదు లాక్షితిపతి పరిక్షితునకుఁ బరమాదరంబున సమర్పించి యతనిం గృపాచార్యునకు శిష్యుం గా నప్పగించి పౌరజానపదప్రవర జనంబుల రావించి. (17)

5.శత్రు జయంకోసం – ఆరణ్యపర్వము – ప్రథమాశ్వాసము – 276వచనము

వ॥అని ధర్మతనయు నేకాంతప్రదేశంబునకుం దోడ్కొని చని సత్యవతీసుతుండు విధిదృష్టవిధానంబునం బ్రతిస్మృతి యనువిద్య నుపదేశించి దీనిశక్తి నర్జునుండధిక తపోవీర్యవిభవుండై యింద్రయమవరుణకుబేరాది దేవతలను నీశ్వరునిఁ బ్రత్యక్షంబు సేసికొని వారలవలన దివ్యాస్త్రంబులు వడసి శత్రువుల జయించు… (276)

***********