కవిత్రయ శ్రీమదాంధ్రమహాభారత ప్రశ్నోక్తి - 067 (331 – 335)

ఓం గణేశాయనమః – గురుభ్యోనమః

                                                                         __/\__       

నారాయణం నమస్కృత్య  – నరంచైవ నరోత్తమమ్|

దేవీం సరస్వతీం వ్యాసం – తతో జయముదీరయేత్|

[డా.తిప్పాభట్ల రామకృష్ణమూర్తిగారి మహాభారత ప్రశ్నోక్తి (క్విజ్) పుస్తకము (1994) ఆధారంగా]

1.  మహాప్రస్థానంలో వచ్చిన కుక్క ఎవరు?

2. ఘోషయాత్రలో గంధర్వుని పేరేమి?

3. దుష్టచతుష్టయంలో చిన్నవాడెవరు?

4. శకుంతలా దుష్యంతుల కథను సంస్కృతంలో ఓ కవి నాటకంగా వ్రాశాడు – ఆ కవి ఎవరు? ఆ నాటకం పేరేమి?

5. ధర్మరాజును చంపుతానన్న అర్జునుని వారించిన దెవరు?

-----------------------------------------------------------------------------------------------------------------------

 సమాధానములు (జవాబులు):

1.యమధర్మరాజు – ధర్మరాజు యొక్క ధర్మనిరతిని పరీక్షించటానికి వచ్చాడు. – మహాప్రస్థానికపర్వము –  

  ఏకాశ్వాసము – 61 పద్యము

సీ|| అ ట్లతిదృఢనిశ్చయంబుగఁ బలికిన తనపుత్రుఁ గనుఁగొని ధర్ముఁ డధిక

     సమ్మోదమును బొంది సారమేయాకృతిఁ బాసి తా నాత్మరూపంబుఁ దాల్చి

     పరమసంభ్రమకృతప్రణతియు నానందభరితుండు నగునానృపాలుతోడ

     నీపుణ్యవృత్తంబు నిర్మల మేధయు నఖిలభూతంబులయందుఁ గలుగు

తే|| దయయు నాదుచిత్తముఁ బ్రమదమునఁ దేల్చె

     వత్స భులోకమున నిట్టివారుఁ కలరె

     తొల్లియును ద్వైతవనమున దోషదూర

     మయిననీమనమున తెఱం గరసినాఁడ (61)     

2.చిత్రసేనుడు – ఆరణ్యపర్వము – పంచమాశ్వాసము – 395 పద్యము; 396 వచనము

క|| గంధర్వులు దెరలుట విని

    గంధర్వవిభుండు క్రోధకలుషితమతి యై

    గంధగజముచందమున మ

    దాంధగతిం గవిసెఁ గౌరవానీకముపై (395)

వ|| ఇట్లు కవిసి చిత్రసేనుండు. (396)

3.దుశ్శాసనుడు

4.కాళిదాసు – అభిజ్ఞాన శాకుంతలము – ( శకుంతలా దుష్యంతుల కథ ఆదిపర్వము – చతుర్థాశ్వాసము లోనిది)

5.కృష్ణుడు – నిందింపుమని చెప్పి నివారించాడు.  గురుని నిందిస్తే వధించినట్లే అనే న్యాయంతో – కర్ణపర్వము – తృతీయాశ్వాసము – 82,84 పద్యములు&85 వచనము

  చ|| అతిశితకర్ణ బాణహతి నంగము నొచ్చినదాన నల్గి యి

       ప్పతి నిను నొవ్వఁ బల్కుటిది ప్రాభవ మింతియె కాక నీయెడన్

       మతిఁ బటుకోపముం గలదె మారుతసూనుఁడు నీవుఁ దమ్ములుం

       జతురవినీతి నీతనివశంబునఁ గాదె చరింతు రెప్పుడున్ (82)

  క|| నీ విట్టివాఁడ వని ధర

      ణీవిభునిం బలుకు మదియ నీచంపుట సం

      భావించి పిదపఁ బ్రణతుఁడ

      వై వినయము చేయు చిత్తమలర నతనికిన్ (84)

  వ|| అ ట్లయిన నసత్యదోషంబునకు గురువధపాతకంబునకుం దొలంగి సమాహితుండ వగుదు…..(85)

***********************************************************