తెలుగు సుద్దులు - వేమన పద్యములు (తెలుగు - ఇ కూటమిలో పెట్టబడినవి) -148

తెలుగు సుద్దులు…..(148)

ఆ.వె॥దేశ వేషములను తేట సేయక దేవు

           డా`త్మ లోన నుండు న`నగి పెనగి           

           వేస మ`రసిచూడ గ్రాసంబు కొరకయో    

           విశ్వదాభిరామ వినర వేమా!.

భావముః                  

ఎవరు ఎన్ని వేషాలు వేసినా పరమాత్మ (భగవంతుడు) మటుకు ప్రతిజీవి ఆత్మలో స్నేహంతో మమైకమై జతపడి ఉంటాడు.  ఈ సత్యాన్ని (పరబ్రహ్మతత్వాన్ని) గ్రహించినవారే దైవజ్ఞులు.  కపట వేషదారులను (చిత్తశుద్ధి లేనివారు) జాగ్రత్తగా పరిశీలిస్తే (వివరము తెలుసుకుంటే) ఆ వేషాలన్ని పొట్టకూటికోసమే అనే సత్యం బయటపడుతుంది సుమా! పైపై వేషభాషలకు మోసపోవద్దని వేమన హెచ్చరిస్తున్నారు.

శ్రీశ్రీశ్రీ శంకరాచార్యుల వారి భజగవిందం శ్లోకాల్లో ఇదే హెచ్చరిక చేయబడింది కదా!

శ్లో॥జటిలో ముణ్డీలుఞ్చిత కేశః

      కాషాయాంబర బహుకృత వేషః |

      పశ్యన్నపి చ న పశ్యతి మూఢో

      హ్యూదర నిమిత్తో బహుకృత వేషః ||

      భజగవిందం భజగోవిందం
      భజగోవిందం మూఢమతే!
బోడికొట్టినను, జడలు బెంచినను భువిలో మూర్ఖుడు బ్రహ్మంబును చూడలేడు; మఱి పొట్టకూటికై దొంగ వేషములు (పలువేషాలు)వేయునురా తెల్సుకొనము.  ముక్తికి “ గోవిందా ” యని హరి నామ స్మరణ చేయరా ఓ మూఢా! భగవన్నామ స్మరణ మించినది లేదు. ||10-02-2015||